ភ្នំពេញ៖ ក្រសួងសាធារណការ និងដឹកជញ្ជូន បានសម្រេចមិនអនុញ្ញាតឱ្យរថយន្តដែលកែច្នៃ «ឡើងម៉ូដែល» ដែលគ្មានកាអនុញ្ញាតពីក្រសួងអាចចូលត្រួតពិនិត្យលក្ខណៈបច្ចេកទេស (ឆៀក) ឬចុះបញ្ជីផ្ដល់បណ្ណសម្គាល់ និងបំពាក់ផ្លាកលេខសម្គាល់ម្ចាស់យានជំនិះឡើយ ដោយថាការតម្លើងស៊េរីទាំងនេះបានធ្វើឱ្យប៉ះពាល់ដល់ផ្នែកសុវត្ថិភាពរបស់យានយន្ត។
ក្នុងសេចក្ដីជូនដំណឹងចុះថ្ងៃទី៥ ខែមេសា ឆ្នាំ២០២២ ក្រសួងសាធារណការបានបញ្ជាក់ថា ក្រសួងបានសង្កេតឃើញថារថយន្តគ្រួសារមួយចំនួនបានកែច្នៃដំឡើងម៉ូដែលដោយមិនត្រឹមត្រូវតាមលក្ខណៈបច្ចេកទេស និងគ្មានការការអនុញ្ញាតពីក្រសួងដែលបណ្ដាលឱ្យប៉ះពាល់ដល់ផ្នែកសុវត្ថិភាពរបស់យាន និងបានធ្វើឱ្យប្រែប្រួលអត្ដសញ្ញាណសម្គាល់របស់រថយន្តដែលផ្ទុយទៅនឹងច្បាប់ស្ដីពីការគ្រប់គ្រងយានដ្ឋានជួសជុល និងយានដ្ឋានកែច្នៃដំឡើងយានយន្ត។
ក្រសួងសាធារណការបញ្ជាក់ថា៖ «អាស្រ័យហេតុនេះក្រសួងសម្រេចមិនអនុញ្ញាតដល់រយន្តដែលកែច្នៃដំឡើងម៉ូដែលដែលគ្មានការអនុញ្ញាតពីក្រសួងគឺមិនអនុញ្ញាតឱ្យចូលពិនិត្យលក្ខណៈបច្ចេកទេស ឬចុះបញ្ជីផ្ដល់បណ្ណសម្គាល់និងបំពាក់ផ្លាក់លេខសម្គាល់យានជំនិះឡើយ»។
លើសពីនេះយានដ្ឋានកែច្នៃដំឡើងរថយន្តដែលធ្វើសកម្មភាពកែច្នៃដំឡើងម៉ូដែលរថយន្ត ដែលប៉ះពាល់ដល់ផ្នែកសុវត្ថិភាពរបស់យាន និងមិនបានស្នើសុំការការអនុញ្ញាតកែច្នៃដំឡើង ក្រសួងសាធារណការនិងដឹកជញ្ជូន នឹងចាត់វិធានការចុះបិទផ្អាកសកម្មភាពធ្វើអាជីវកម្មនៅទីតាំងយានដ្ឋាននោះផងដែរ៕